E aha mau na te ‘ohipa i tupu i te pō mahana piti i te tuha’a Pékin i Pape’ete ? Nā te mau tītorotorora’a te reira e fa’a’ite mai. Te mea pāpū, ‘ua ‘uta-rū-hia te tino pohe o hō’ē tamahine 7 matahiti e tōna mau metua fa’ari’i i te fare ma’i Pā’ōfa’i ‘inapō nei.
Tupu te maere o te feiā e noho ra nā pīha’i iho i tāua ‘utuāfare ra. « E tamahine ihoa tā’u i ‘ite nā io tō’u feti’i. E toru tamari’i tā rāua e ha’apa’o ra nō te pū tōtiare mai ».
Nā te ‘aoa ‘ūrī ia fa’aara i vetahi. « ‘Aoa noa te ‘ūrī i te ārea nō te hora 10, ‘aita e fa’aeara’a, maere roa vau. Haere mai nei au e hi’o, ‘aita e ta’ata, ho’i fa’ahou atu ra vau e ta’oto ».
I te reo o te ‘auvaha ture, nā te mau hi’opo’ara’a a te taote e ha’apāpū te tumu o teie ‘ati pohe. E riro ra, mea ‘ino te tino o teie tamahine i te ‘itera’ahia mai.
‘E’ere te ‘utuāfare mātauhia nō te mau pe’ape’a. Mea maoro tōna fa’ari’ira’a i te mau tamari’i a te pū tōtiare. I teie nei mahana, tei raro a’e te mau metua tīa’i i te hi’opo’ara’a a te mau mūto’i.
