Mātau noa tātou i te ite atu i te mau mā’a hotu i ni’a i te mau pa’epa’e. I teie nei, ‘ua ō ato’a mai te mau mā’a tāvirihia, fa’ahuru’ēhia, tei roto i te mau mōhina ‘e ‘aore i roto i te mau pū’ohu. ‘Ua rau te huru ravera’a. Ei hi’ora’a te mau inu mā’a hotu fa’aineinehia e Fanny.
« E ho’o vau i te mau mā’a hotu tanu-nātura-hia e te feiā fa’a’apu. E ‘āno’i au mai te ‘aute ‘e te re’a e hi’o atu ai te huru. Mai te mea, e au tā’u mau tamari’i e tapiho’o ia vau ».
Fa’a’ohipa i te mā’a tupu, fa’aiti i te ha’amāu’ara’a, teie te tauto’ora’a a Moerani Lemaire. Ta’ata fa’a’apu, tē tāviri nei ‘ona i te mau mā’a o tāna iho i fa’atupu. Nō na e » fa’a’itera’a terā i te ta’ata e, e nehenehe e fa’a’ohipa atu ā i tā tātou mā’a ».
‘E’ere noa te mā’a tupu te tāvirihia. ‘Ohipa tautai tā te ‘utuāfare ‘o Sylvana, e i’a hinu tāna i fa’aineine. « E ta’ata tautai tō’u taea’e. ‘Ua pa’ari mātou i roto i teie ‘ohipa. ‘Ua ō mai te mana’o e fa’ahuru’ē i te i’a ia ‘ore ia pau i te ho’ohia ‘e ia tae i te tau ‘auhune. Nā tō’u metua i ha’api’i mai ia’u. E fa’a’ohipa vau i te ha’urā, terā i fa’ano’ano’ahia i te re’a ‘e te papirika te mea tere roa ».
‘Ia ‘amu te huira’atira i te mā’a nō te fenua nei, te tauto’ora’a rahi ia a te fa’aterera’a o te fenua nei.
« 75% o te mau mā’a hotu nō te ara mai ‘e tā tātou, 25% noa. Teie e hina’arohia nei, ia hau atu i te 25%. Hō’ē hi’ora’a, ‘ia tae i te tau e ‘auhune tā tātou mau mā’a, ‘e’ita e pau. Hō’ē noa rāve’a, e tāviri tā tātou mau mā’a, faire de la transformation », i te reo ‘o Thomas Moutame, peretiteni nō te piha rautea.
Te fāriu ato’a ra te piha rautea i ni’a i te ha’afaufa’ara’a i te ‘i’o ‘ānimara.
E hope te mātete fenua i te 11 nō mē.
