Nā tōna iho ‘utuāfare i ha’apārare i teie parau pe’ape’a i ni’a i te tahua natira’a i teie nei po’ipo’i mahana piti. ‘Oi’oi roa te mau parau fa’atau aroha i te mātara mai.
Fānauhia i te matahiti 1950, i Pape’ete tō Errol Bennett tu’ura’a i tōna mau ta’ahira’a ‘āvae mātāmua i roto i te ‘ohipa tū’aro. I Central sport tōna ha’amatara’a i te tu’e i te pōpō, 13 matahiti i tāua taime ra. Nā roto i te mau fa’aineinera’a tāmau, e 8 taime, mutu-‘ore, i te harura’a i te ti’ara’a ‘aito nō Tahiti. ‘Ua ‘itehia tōna ‘aravihi, i riro mai ai 11 a’e taime te mā’ona i fa’aō i te tāpa’o rahi roa a’e i roto i te mau hā’utira’a.
I te matahiti 1972, tei te pupu PSG ‘o Errol Bennett nō te hō’ē tau poto hou a ho’i mai ai i Tahiti nei. ‘I roto i te pupu mā’iti nō Tahiti, ‘ua roa’a iana i te feti’a ‘auro i te heiva tū’aro nō Pātitifā i te matahiti 1973, 1975 ‘e 1983. I te matahiti 1973 noa ā, ‘ua haru ato’a i te ‘āu’a nō ‘Ōteānia.
