Nā te karatino farāni, Dominique Mamberti i fa’aara i te tā’āto’ara’a e « pāpa ‘āpi tō tātou », « habemus papam ». Nāna ato’a i fa’a’ite atu i te naho’a ta’ata tei tāpapa atu i te tahua Petero peata, ‘o vai mau nā ‘o Reone XIV.
‘Ua ‘ūmere te mau teretetiāno i te ti’ara’a mai te pāpa i mua ia rātou e te nā’ora’a i roto i tāna poro’i « ia vai te hau i roto ia ‘outou », « la pace con voi ».
I te fenua nei, hō’ē ā ‘oa’oa. ‘Ua pāpū i te metua vārua Aperahama te mau arata’ira’a a te pāpa.
« Oia ho’i, ‘ia piri te ‘ētārētia i te feiā veve. E ‘imi ato’a ‘ona i te rāve’a ia hō’ē te ‘ētārētia i roto i te raura’a. Te mana’o nei au, e ‘imi ‘ona i te mau rāve’a ato’a nō te fa’atupu i te fārereira’a i roto i te mau fa’aro’o ‘e’ē. E pāpa terā e ‘imi i te rāve’a nō te feiā ‘āpī, nō te mea terā te tauto’ora’a rahi a te ‘ētārētia ».
‘O Robert Francis Prevost tōna i’oa tīvira, 69 matahiti, metua tāne mārite, metua vahine farāni, fānauhia i Chicago i te fenua mārite. ‘Ua nōminohia ei karatino i te matahiti 2023. 20 matahiti i te tāvinira’a i te fenua Perou. I muri a’e piti mahana matutura’a i rotopū i te mau karatino i Roma, ‘ua mā’itihia ‘ona nō te arata’i i te fa’aro’o tātorita. Nāna e mono i te pāpa François.
« Tītauhia tātou te mau teretetiāno, ‘ia ora tātou i roto i te hau. ‘Ia vai noa tātou i roto i te here o te kirito », i te reo o te katekita Hanere, nō te tātetara nō Pape’ete.
I te ‘āva’e tētepa, e fārerei atu te mau perepitero nō te ‘epikopora’a nō Pōrinētia i te pāpa Reone 14 i Roma.
