Mea nā roto i te rāve’a natirara te parau ‘āpī i te pūhara’ahia e te tamaiti a Jeanine Sylvain, te ta’ata pata hōho’a Teva Sylvain, nō te fa’aarara’a e ‘ua pohe tōna metua vahine.
« Tei pīha’i iho ‘ona i tōna hoa here. Rāua to’o piti nō te orara’a mure ‘ore», i tāna mau pāpa’ira’a.
Fānauhia Vidal, ‘ua ha’aipoipohia na ‘o Jeanine Sylvain i te ta’ata pata hōho’a tu’iro’o ra ‘o Adolphe Sylvain. Mai reira mai tōna ‘ite pinepinera’ahia i ni’a i te mau hōho’a. « Rau te mau ta’ata ‘itehia tei fārereihia atu e ana, eiaha noa terā mau pu’era’a nō te ‘showbizz’, te mau ta’ata ti’ara’a teitei ato’a ra», i te paraura’a a tōna ‘utuāfare feti’i.
‘Ua fārerei roa ato’a atu ‘ona i te tenerara De Gaulle, i tōna haerera’a mai i Tahiti i te matahiti 1958. «Nāna i fa’ahei atu ‘iana i tōna paura’a mai, a pata noa ai tāna tāne i te hōho’a ».
I roto i tōna orara’a, ‘ua amo ato’a mai na ‘o Jeanine Sylvain i te tōro’a tuati ma’i ‘e i muri iho tuati fa’afānau. E pae tamari’i tā rāua ‘o Sylvain : Moea, Vaea, Teva ‘e ‘o Maima.
I te 60 ra’a o tōna matahiti, ‘ua ha’amau ato’a ‘o Jeanine Sylvain i tāna taiete ho’ora’a fenua ‘e fare.
