Te fā o teie nei fārereira’a, « fa’ahōhonu atu ā i te mau aura’a » i rotopū i te hau marite ‘e te mau fenua nō Pātifita i ni’a anei i te tauira’a o te reva, te fa’arava’ira’a faufa’a, te ea. E fēruri ‘āmui ato’a rātou i ni’a i te mau rāve’a e tano ‘ia ha’amauhia nō te pāruru i te mau ‘ōti’a moana i te rava’āi huna, i te reo ‘o Karine Jean-Pierre, te ‘auvaha parau ‘o te peretiteni Biden.
Mai tāna i ha’apāpū i ni’a ia TNTV, e ‘āmui ato’a atu te peretiteni nō Porinetia Farāni Moetai Brotherson ‘i teie nei rurura’a. Mai reira, tāpapa atu ai ‘i te ONU, te hau ‘āmui, nō te rurura’a a te tōmite 4, nāna e tī’ā’au ra i te parau nō te fa’ati’amāra’a.
E nō te mea, te nu’u noa atu ra te fenua Taina i roto i te moana Atia-Pātifita, te tumu ato’a o teie huru fārereira’a. ‘E’ere a tahi nei ‘a fa’atupuhia ai e Joe Biden, ‘ua tupu a’e na i te ‘āva’e tetepa 2022. Mea tupu fa’ahou i te ‘āva’e mē ra ‘i te fenua Pāpua, nō te fifi poritita ra ‘e te pae pāto’i marite, ‘ua fa’ataimehia te reira.
