‘O Tahiti iti tei mā’itihia nō te fa’atupura’a i teie nei rurura’a ‘o te mau mero ‘āpo’ora’a ‘oire ‘e te fa’atera’a hau fenua ‘āpī. A tahi nei na pae e piti e fārerei ‘āmui ai, inaha 42 rātou tei roto i te Tapura huira’atira, « e tau teie nō te ‘aitauira’a mana’o », i te reo ‘o te peretiteni Brotherson.
‘Ua haere mai ‘ona nō te ‘imi i te mau rāve’a nō te ha’amāmā i te hōpoi’a a te mau ‘oire mai te ha’amā’arora’a i te pape vi’ivi’i, te ‘ōperera’a i te pape mā ‘e nō te ‘ohira’a i te pehu a te nūna’a : « te tupu maite ra, ‘inaha e rave noa vau i te hi’ora’a o te fare ora, e ono tu’urimara’a tei tupu i teie mahana ‘e fa’atata e piti ahuru mā hō’ē ‘oire terā e tīa’i ra ia nehenehe mātou ia tu’urima i teie fa’anahora’a fare ora, tāpa’o maita’i te reira « mai tei ha’apāpūhia mai e te peretiteni nō Pōrīnetia Farāni.
I tōna ato’a mana’o « ‘eiaha te mana ia vai noa ‘i Tahiti », teie ia e māuruuruhia nei e te mau tāvana nō te mau motu atea mai ia Nari’i Tuana’ina’i, tāvana nō Rapa :« mea au roa nā’u te peretiteni nō te hau fenua i roto i tāna mau poro’ira’a. Te mea noa ra tā’u e tīa’i ra te taime e rave ai, e ha’apāpū ai i te reira mau mana’o tōna. Te mea ‘e ‘erehia ra, te faufa’a ihoa ia nō te ‘āpe’era’a i te mau ‘oire nō te ha’amanuiara’a i teie mau ‘ōpuara’a ». Te pū’oi ato’a mai nei te haka’iki nō Nuku Hiva, Benoît Kautai : « ‘ia ‘ōperehia te mau mana nā ni’a i te mau ta’amotu. ‘Āpitipiti ia te hau fenua ‘e te mau ‘oire nō te fa’ahotura’a i tō tātou mau ta’amotu ».
Hō’ē ā ato’a fērurira’a tō te tāvana nō Faa’a, Oscar Temaru, te maha ‘ahurura’a teie o te matahiti a mau mai ai ‘oia i teie nei ti’ara’a : » ‘e’ere mātou i te ‘enemi. I’o noa, ‘ua fa’aea. Te porotita, ‘e’ere te motora’a, e fa’atitora’a mana’o ra ».
I ni’a i te ‘ōpuara’a nō te ti’ara’a ta’ata mā’ohi, te uiui ra te mana’o : « ‘aita mātou e hina’aro ra ia ha’amā’ohihia mātou. Te fa’a’ite ra te peretiteni nō roto mai te pūai ‘o Pōrīnetia i tōna raura’a. E tāpe’a ia i terā raura’a nā roto i te hīro’a, te reo, tei i’o mātou », i te reo ‘o Felix Barsinas, te haka’iki nō Tahuata.
E tamau ā teie nei rurura’a matahiti e tae atu i te mahana pae. I te ‘ōmuara’a ‘o teie nei fārereira’a, ‘ua fa’aotihia hō’ē pure nō Edouard Fritch, tāvana nō Pīra’e e peretiteni tahito nō Pōrīnetia, tei mau i te fare ma’i ‘i Paris. ‘Ua tāpūhia ‘e mea maita’i roa ‘ona.
