‘Āpe’ehia e te mero ‘āpo’ora’a ‘iriti ture, Steeve Chailloux, ‘ua fa’ari’ihia ‘o Moetai Brotherson e Nicolas de Rivière i tāna pū ‘ohipara’a, i pīha’i iho noa atu i te hau ‘āmui. Taime nō te pū’ohura’a i te mau ‘ohipa i tupu na i te rurura’a a te tōmite 4, i te mahana piti.
« ‘Ua ha’amāuruuru fa’ahou vau ‘iana nō tōna ti’ara’a mai i te tōmite 4. ‘Ua ha’apāpū ato’a vau i tō mātou mana’o hepohepo, ‘eiaha nō tātou, nō Farāni ihoa ‘inaha te huru parau tāna i tu’u i mua i te hau ‘āmui ‘ua riro ‘ei māna’ona’ora’a ‘e mā’ino’inora’a nō te tahi atu mau fenua i roto i teie tōmite 4″, te mau mana’o ‘o Moetai Brotherson i muri a’e i te fārereira’a.
« Teie ta’ata ‘o Nicolas de Rivière, e ta’ata rave ‘ohipa noa ‘ona nā te hau farāni. Te mau tāu’ara’a parau hōhonu, e tupu ia i rotopū ia’u ‘e te fa’aterera’a hau farāni ‘e te peretiteni o te hau farāni ».
I ni’a i te tū’ati-‘ore-ra’a o te mau parau a te peretiteni nō Pōrīnetia i tā Oscar Temaru ‘e Antony Géros, te fa’a’ite ra ‘o Moetai Brotherson, ‘e’ere hō’ē ā ti’ara’a tō rātou.
« Te ‘aitaui nei mātou i ni’a i tā mātou huru hi’ora’a o te nu’ura’a o te ‘ohipa, i muri mai, te reira ta’ata e tāna huru pūharara’a i te poro’i. Nā ni’a i tō’u nei ti’ara’a peretiteni nō Pōrīnetia, tei ia’u i te vauvaura’a atu i Paris i te hīa’ai o te Tāvini, ‘eiaha ato’a ra ia mo’ehia ia’u, i roto i tā’u mau paraparaura’a ‘e te hau nui, i te ha’amana’o ato’a i te mau ta’ata ‘e’ere i te Tāvini », i te reo o Moetai Brotherson.
E ho’i mai te peretiteni i te fenua nei a tāpati pō.
