Nā teie noa mau hōho’a e fa’a’ite i te teimaha ‘o teie ‘ati. Mahana mā’a ma’iri, ‘ua fa’aoti na te tahi mau hoa ‘e haere i te mou’a Mārau, nō te fa’a’eta’eta tō rātou tino, ‘ei fa’aineinera’a no te tahi horora’a i teie mau tau i muri nei. ‘I te taime ho’ira’a, ‘i fa’aoti ai ‘e 2 vahine i te horo no te ha’apou mai. Hō’ē tei mua roa ‘e hō’ē ‘i muri. Tae ‘i te hō’ē taime, fa’aruru mai nei te vahine i muri ‘i te hō’ē ‘ūrī, ‘aita rā ‘i ‘ite nā ‘ūrī ‘e piti ‘i te nā muri ra’a mai, ‘āfaro roa i ni’a ‘i tōna ‘āvae. ‘I taua taime ra, ‘aita ‘oia ‘e nehenehe fa’ahou e haere. « ‘Ua tāpū hia tō’u ‘āvae e ua tamata te taote tāpū i te fa’atiti’aifaro fa’ahou tetahi tuha’a ‘o tō’u ‘āvae tei ‘amu roa hia ‘e te ‘ūrī. Hau i te 50 nira ra’a tei rave hia tae noa atu te uaua ‘o te ‘āvae. Teie nei, tīa’i atu ra ia, ‘e ua manuia ānei te tāpū ra’a ‘aore ra, tītau fa’ahou hia ‘e tāpū. ‘E te ti’aturi nei vau e, ‘e e ora maita’i hoa vau » te reo teie ‘o te hō’ē o te mau vahine i hōhoni hia.
‘I te taime ‘a ‘aro noa ai i te ‘ūrī tōna ‘ite ra’a te toto i ni’a ‘i te fenua ‘e te hō’ē niuniu parauparau ‘āfa’ifa’i. ‘I reira ato’a ‘oia ‘i te pāpū ra’a ‘e ua hōhoni ato’a hia tōna hoa ‘o Aurélie, tei horo nā mua atu iāna. Hoa ‘o tei tamata i te fa’aāra iāna. ‘I muri mai rā, 2 kiromētera te ha’apoura’a, tae atu ai i te vahi tāpe’ara’a pere’o’o, ‘i roa’a ai iāna ‘i te tāniuniu i tōna hoa. ‘Ua tāere roa rā, ‘ua hōhoni ‘ino roa hia tōna hoa. « Tītau hia tātou e fāna’o tetahi mau vāhi horora’a maita’i, mea faufa’a roa. Te mea ‘e ‘ite hia ra, te mau vāhi ato’a tā tātou ‘e tere nei, te Belvédère ānei, te Mission, ‘i te mou’a Mārau. Te fa’aruru noa nei tātou i teie mau ‘ūrī taehae. Ua mātau roa tātou i te reira, ‘e’ere i te mea tano. Tītauhia tātou e rave i te mau fa’anahora’a ato’a, i roto i te maita’i, ‘ia fāna’o tā tātou mau tamari’i i te orara’a hau » te reo o te piti o te vahine i hōhoni hia.
‘Āre’a te toru o te ta’ata ‘i hōhoni ato’a hia, ‘o te tāne ia o te vahine i hōhoni ‘ino roa hia ‘e ‘aita e haere maita’i fa’ahou nei teie mahana. Mai te peu, ua hōhoni ato’a hia tōna ‘āvae, ‘ua roa’a ra iāna ‘i te tiahi atu nā ‘ūrī e toru ‘e tāna ‘āuri turu’i nō te fa’a’ōhie te haere ra’a. ‘I teie mahana mā’ino’ino rahi tōna i teie mau ‘ūrī, hau roa atu rā, mā’ino’ino rahi atu ā tōna ‘i te fatu ‘o teie mau ‘ūrī tae noa atu te mau ti’a mana ‘o te fenua. « Te vai ra te tahi mau ‘ūrī, ‘ua ha’api’i maita’i hia rātou. Ha’apa’o maita’i hia rātou i roto ānei i tō rātou mau ‘āua, ‘ua tā’amu hia. Te vai rā ihoa, mea ha’apa’o maita’i. Rave rahi ra, ‘aita roa ha’apa’o ra’a. Rave noa rātou ‘i te mau ‘ohipa tano ‘ore. ‘Ō rātou te ti’a ‘e fa’autu’a maite hia. Tītauhia e ia fa’a’ohipa hia te ture. Mea ‘ōhie roa nō te parau. Teie ra, ‘o vai mā teie ‘e ‘ore nei e fa’a’ohipa maite te reira, ‘o te mau ti’a mana, nā mua roa, te ‘oire ānei, te hau fenua ‘e te hau nui ato’a. ‘Aita roa rātou ‘e rave nei i tā rātou nei tuha’a » te reo mā’ino’ino ‘o Thierry COQUET i mua i teie ‘ati.
Mana ānei nā te ‘oire, mana ānei nā te hau fenua ‘e ‘aore rā mana ānei nā te hau nui, te mea pāpū mai te peu ‘aita rātou ‘e rave ‘āmui i te ‘ohipa, ‘e’ita ato’a ia teie ‘ohipa ‘o te ‘ūrī ‘ōvere ānei, ‘ūrī taehae ānei e tō rātou mau fatu, ‘e ārai hia.
‘Ua ‘īritihia te hō’ē tītorotorora’a, ‘i te po’ipo’i mahana piti, hō’ē o te mau ta’ata i hōhoni hia tei ho’i i ni’a i te mou’a, ‘i reira te tupura’a teie nei fifi. ‘Āpe’e hia atu ‘oia e te mau mūto’i ‘oire nō Fa’a’a, mūto’i e nāna e ti’a’au nei te ‘ohira’a ‘o te mau ‘ūrī ‘ōvere. « Tō mātou ti’ara’a teie mahana, te haerera’a ihoa ia e tītorotoro, ‘o vai mau nā te fatu ‘o teie mau ‘ānimara ‘o teie hōhoni teie feiā tei haere mai ‘e fa’a’eta’eta i tō rātou tino » Aldo STERGIO, mūto’i ‘oire e ti’a’au nei te ‘ohira’a ‘o te mau ‘ānimara ‘ōvere i Fa’a’a.
Te mea pāpū, nō Thierry COQUET, hō’ē o te mau ta’ata i hōhoni hia, ‘aita teie fifi tāna i fa’aruru ‘i te mahana mā’a ra, i mo’e atu ra. « ‘E toru taime fifi mau, ‘aita ho’i mātou i horo ‘āmui teria taime. Te vai ra teie hoa vahine tō māua, ‘ua tauturu hia ‘ōna ‘e piti nau taure’are’a. Te piti, tā’u ia vahine, ‘ua pi’i ‘oia i te feiā tūpohe auahi, ‘e ‘ua tāere, te pāhonora’a. Te hina’aro nei au e ia amo te ta’ata i tāna hōpoi’a, ia ‘ore e tāmau noa teie ‘ohipa« .
‘E’ere teie huru fifi i te ‘ati mātāmua i Fa’a’a, ‘e’ere ato’a i te mea ‘ino roa, ia fa’aauhia teie i fa’aruru hia e Thierry. « …mea māna’ona’o, mea ti’a ‘e ia rave hia te tahi fa’a’otira’a pāpū maita’i nō te mau fatu ‘ūrī » te reo pe’ape’a ‘o te mūto’i ‘oire nō Fa’a’a.
Te vāhi faufa’a e tāpe’a mai, ia fa’a’amu ‘outou i te hō’ē ‘ānimara, ‘i mua i te ture, ‘ua riro ‘outou ‘ei ta’ata ha’apa’o. Mai te mea ra ho’i, ‘e’ere nā ‘outou te ‘ānimara, ia tupu noa te hō’ē fifi, nā te tāvana ‘oire e fa’aoti tōna parau.
