Parau teie i fa’arahi’a i te ‘āva’e fepuare ra, ‘e ‘i teie mahana ‘ua tupu. I muri a’e 20 matahiti ora ‘āmuira’a, ‘i teie mahana, ‘ua tā’atihia ‘o Gaston Flosse ‘ia Pascale Haiti.
Te na’o ra o Pacale Hauti « mai te matahiti 1996 ra tō’u ‘itera’a te faufa’a rahi o teie ta’ata, terā rā ‘e vahine tāna ‘e tāne atoa tā’u, ‘e ‘ua tae ‘i te hō’ē taime ‘ua fārerei na feti’a e piti.
I te mahana mā’a ra tō Pascale Haiti ha’apāpūra’a i tāna ‘ē i te Peretetini tahito nō Pōrīnetia.
Nō Gaston Flosse ‘e mahana rahi mau teie no rāua, mahana tīa’i-maoro-hia, ‘e rave rahi ho’i matahiti to rā’ua ora’āmuira’a.
‘Oa’oa rahi tō Gaston Flosse, ‘inaha ‘ua riro ‘o Pascale Haiti i teie mahana ‘ei vāhine nāna, ‘e te ha’amāuruuru ato’a ra ‘oia ia Pascale Haiti no tōna here e tōna tāvini-maita’i-ra’a iana.
‘E ’ere nā Michel Buillard ‘i fa’ahanahana ‘i teie ‘ōro’a , nā te mono tāvana ra nō Pape’ete, ‘o Sylvana Puhetini, e anira’a teie mai roto i nā ti’a e piti ‘i tā’atihia.
Aita ato’a ‘o Bruno Sandras mero nō te tāpura ‘Amuitahira’a ‘o te nūna’a mā’ohi, hoa rahi ato’a nō Gaston Flosse, ‘i huna I tōna mana’o ‘oa’oa. I tōna reo, « ‘ua tupu te moemoeā a Pascale Haiti, ‘ua tupu roa tō rāua ‘ōro’a fa’aipoipora’a. ‘Aita i ‘ōhie te orara’a ‘o Pascale ‘i pīha’iho ‘ia Gaston, noa atu ra te reira, ‘ua ara i ni’a ‘ia Gaston Flosse ‘e tae mai i teie nei mahana».
‘Ua tupu ato’a te ‘oa’oa i roto i te mau tamarii a Gaston Flosse mai ‘ia Kaiva. Te na’ō ra oia « i tō’u fa’aro’ora’a ‘i te parau nō teie fa’aipoipora’a, i te taime porora’a poritita ia, ‘i te fa’a’āpīra’a mero ‘āpo’ora’a rahi, ‘e ‘ua hitimahuta mātou. ‘Ua topa ato’a ra te hau, te tumu e ‘ōpu’ara’a teie ‘i feruri-ātea-hia ‘e rāua ». ‘E te pū’ohura’a mā te parau e « ‘ua riro ‘o Pascale Haiti ‘ei turu pāpū nō tō mātou metua tāne ‘e te ti’aturi ra mātou, te ‘ohipa ato’a ia ‘e ravehia ra e tō matou metua tāne nō Pascale Haiti».
Nā roto i teie tā’atira’a, ‘ua riro roa ‘o Gaston Flosse ‘e ‘o Pascale Haiti i teie mahana ‘ei mero tumu nō te oire nō Pape’ete.
Te torura’a teie te taime ‘a fa’aipoipo ai ‘o Gaston Flosse. I te matahiti 1950 ra, ‘ua fa’aipoipohia ‘oia ‘ia Barbara Cunningham, ua fānau ‘e ono tamari’i, ‘i muri mai ‘ua tā’atihia ‘ia Tonita Mao, ‘e toru tamari’i tā rāua.
