Hō’ē ha’urā 365 kiro tei tautaihia ‘i te pae to’o’ā ‘o te rā ‘ia Tahiti

Publié le

'E'ere te pea nei nō Ambroise COLOMBANI 'e tāna tāmaiti 'o Hotu, feiā rava'āi nō Mataiea. 'Ua roa'a tā rāua hō'ē ha'urā 365 kiro. Toru hora nō te fa'aho'ira'a mai 'i te i'a 'i ni'a i te poti.

Piahia i te 28/08/2023 à 16:37 - Fa’arava’ihia i te 28/08/2023 à 16:37

'E'ere te pea nei nō Ambroise COLOMBANI 'e tāna tāmaiti 'o Hotu, feiā rava'āi nō Mataiea. 'Ua roa'a tā rāua hō'ē ha'urā 365 kiro. Toru hora nō te fa'aho'ira'a mai 'i te i'a 'i ni'a i te poti.

« Te tere rā māua ‘i Moorea nō te hope’a hepetoma. ‘Ua fa’aru’e māua ia Mataiea ‘i te area ‘o te hora hō’ē ‘i te avatea. ‘I rapae ‘ia Papara tō māua tu’ura’a tā māua mau ‘apa nō te pūtō. Hō’ē ‘i hora muri mai, te ta’i mai nei te ‘ā’ira. ‘Ua ha’apa’ari te i’a, toru hora tō māua ‘arora’a. Teie tā’u ha’urā rahi roa a’e. ‘E mai te mea ‘e i’a rahi ihoa te « big mama » ‘aita māua ‘i fa’aho’i roa mai te i’a ‘i roto ‘i te poti, ‘ua tāverehia mai rā ‘e māua », te tātarara’a ‘a Ambroise COLOMBANI.

‘E’ere teie metua tāne ‘i te ta’ata rava’āi ‘e rave ‘ohipa rā ‘i roto ‘i te ha’apurorora’a parau. ‘Ua peahia rā ‘ona ‘e tāna tamaiti ‘i te pō farairē ra. Tāna ha’urā mātamua tei ni’a ia ‘i te faito 65 kiro.

‘I mua ‘i teie i’a rahi, ‘aita ‘o Ambroise rāua ‘o Hotu ‘i tere fa’ahou ‘i Mo’orea, ‘ua fa’aho’i mai rā ‘i Mataiea mā te māta’u ‘e ia ‘amuhia tā rāua i’a ‘e te ma’o.

Nā te hō’ē pereo’o pāni ‘i huti te i’a ‘i ni’a te uahu hou ‘a faitohia ai.

Hora iva ‘i te pō tō teie mau ‘ihitai te tapaera’a ‘i te uahu nō Tehoro, ‘i reira rave rahi mau ta’ata ‘e feia rava’āi ‘o te ‘oire ‘i te tīa’ira’a mai ia rāua. « Tā’u ia ‘e ha’amāuruuru maita’i nei », te reo ia ‘o Ambroise. Nā te hō’ē pereo’o pāni ‘i huti teie ha’ura ‘i ni’a i te uahu hou ‘a faitohia ai.

‘E’ere rā teie ‘i te i’a rahi roa a’e ‘i tautaihia mai te ‘ōmuara’a nō teie nei matahiti ‘e te feia rava’āi nō Tehoro. « 425 kiro te i’a rahi roa a’e ‘i tautaihia ‘e te hō’ē ta’ata tāi’a » te ha’apāpūra’a horo’ahia ‘e Ambroise.

‘Ua fa’a’oti nā ta’ata tāi’a to’opiti, ‘e ‘ōpere hō’ē tuha’a ‘o teie i’a « nā te mau hoa, te feia rava’āi ‘e te huira’atira nō teie aroa ».

TNTV

Parau 'āpī hōpe'a

Activer le son Couper le son