‘Aita i mana’ohia, e tupu ra. ‘Ua ha’apāpū te fa’aterehau nui e tī’ā’au ra i te mau fenua nō te aramoana, Gérald Darmanin, e ‘āmui ato’a atu te hau nui i roto i teie mau ‘aitauira’a a te tōmite 4. « Mai te tahi atu mau tumu parau, te rohi ‘āmui nei te hau nui e te mau ti’a nō terā ‘e terā fenua, ‘ia nu’u te ohipa i mua, nā roto i te fa’atura ‘o te mau papature« , tāna i pāpa’i.
‘A tāi’o ato’a : https://www.tntv.pf/tntvreo/poritita/rururaa-a-te-tomite-4-a-te-hau-amui-e-aha-te-tupu/
I te mau matahiti ato’a, e tāpapa te Tāvini Huira’atiri i teie nei rurura’a e tī’ā’au ra i te mau anira’a i ni’a i te ha’ati’amāra’a. Nō te taime mātāmua roa, e ‘ōrero atu ‘o Moetai Brotherson nā ni’a i tōna ti’ara’a peretiteni nō Pōrīnetia farāni. Oia ato’a e tītau nei hō’ē fa’atere mā te fa’atupu hō’ē ti’aturira’a ‘e te hau farāni. Te ‘oa’oa nei te peretiteni nō Pōrīnetia farāni i teie nei mahana i mua i te fa’aotira’a a te hau nui.
« Ia ‘ite mai tātou i teie nei matahiti, te vai ra te tahi tauira’a rahi i roto i te ti’ara’a o te hau farāni i’o nei i te hau ‘āmui, nō niuniu noa mai nei te fa’aterehau Darmanin ‘e ‘ua hōro’a te peretiteni Macron i te tahi mau fa’aotira’a i roto i te rima o teie ta’ata e ti’a nei nō te hau farāni i’o nei i te hau ‘āmui« .
I roto i teie nei rurura’a a te tōmite 4, 7 minuti tei hōro’ahia ia Moetai Brotherson nō tāna ‘ōrerora’a e pū’oi mai ai te toe’a o te mau ti’a nō te Tāvini Huira’atira e tae noa atu tō te ‘ētārētia porotetani mā’ohi.
