I te fare tahua ‘i reira ato’a tā ‘outou ‘āfata teata TNTV, teie fare ha’api’ira’a tuatoru i te vaira’a. ‘I’ō nei ha’api’ihiai te mau piahī nāhea ‘ia tāmaumau te mau hōho’a ha’uti i ni’a i te natirara. Te fā, ‘ia riro teie tōro’a ‘ei ‘imira’a ‘ohipa nā te mau taure’are’a e ‘ana’anatae ra i te ha’uti i ni’a i te natirara, ‘ia tītau rātou te ‘ohipa i te ara. 3 matahiti te pu’e tau nō te tītau te parau tū’ite Licence mention « jeux vidéo ». E 6 ‘orometua ha’api’i tāmau, te tahi pae te rave ra i te ‘ohipa nā te mau taiete rahi nō te ha’uti natirara, mai Tahiti atu rātou e ‘ohipa ai. A tahi matahiti teie nei teie fare ha’api’ira’a tōro’a i te fa’aineinera’ahia e Evans Bohl, te ra’atira o te ha’api’ira’a ‘āpitihia ‘e te pū a te CNAM.
E mai te mea te fa’ahotura’a i te mau rāve’a ‘āpī e tauto’ora’a ato’a a te fa’aterera’a fenua, te tumu ia te peretiteni Brotherson i ti’a mai ai i te ‘ōro’a tomora’a.« Tā’u hina’aro, ‘ia riro teie vāhi… ‘ananahi, ‘ei vāhi nō te fa’ahotura’a te parau nō te roro uira, te parau nō te natirara, te parau nō te patara’a hōho’a, ‘inaha te vai ra ‘o TNTV piri noa mai i teie fare ha’api’ira’a ‘āpī Kanea. E riro te reira, ‘ei natira’a, ‘ei maita’i nō TNTV ‘e nō Kanea », i te reo Moetai Brotherson i teie po’ipo’i nei.
Nō teie taime, 38 piahī tei tāpa’o ia rātou, te toe ā ra te pārahira’a. E hope te mau tāpa’ora’a i’oa i teie hope’a ‘āva’e tetepa. Nō teie matahiti mātāmua, 40-50 pīahi e tīa’ihia ra, e riro ra 700 000 farāne te matahiti mātāmua nā ni’a i te ta’ata tāta’i tahi.
