Fa’ahorora’a pōpō : ‘e ha’a atu te mau taure’a ‘i te harura’a ‘āu’a nō te ao nō te fa’ahorora’a pōpō māoti te fa’anahora’a « campus 2023 »

Publié le

19 rātou taure'a tahiti 'o te 'āmui atu 'i te harura'a 'āu'a nō te ao nei nō te fa'ahorora'a pōpō. 'Ua fāna'o na rātou 'i te fa'anahora'a "Campus 2023" tei fa'aineine 'ia rātou 'i ni'a 'i te mau tōro'a faufa'a 'i roto 'i te orara'a 'o te hō'ē tā'atira'a. Nō te fa'ahope roa 'i tā rātou tau fa'aineinera'a tōro'a, 'e fa'a'ōhipa atu rātou 'i te mau 'ite 'āpī tei 'apohia mai 'e rātou 'i teie nei farereira'a tū'aro 'o te tupu 'i te fenua Farāni 'i teie hōpe'a hepetoma.

Piahia i te 05/09/2023 à 18:24 - Fa’arava’ihia i te 05/09/2023 à 18:34

19 rātou taure'a tahiti 'o te 'āmui atu 'i te harura'a 'āu'a nō te ao nei nō te fa'ahorora'a pōpō. 'Ua fāna'o na rātou 'i te fa'anahora'a "Campus 2023" tei fa'aineine 'ia rātou 'i ni'a 'i te mau tōro'a faufa'a 'i roto 'i te orara'a 'o te hō'ē tā'atira'a. Nō te fa'ahope roa 'i tā rātou tau fa'aineinera'a tōro'a, 'e fa'a'ōhipa atu rātou 'i te mau 'ite 'āpī tei 'apohia mai 'e rātou 'i teie nei farereira'a tū'aro 'o te tupu 'i te fenua Farāni 'i teie hōpe'a hepetoma.

‘I te ha’amatara’a mai ‘o Tanetuiatera Teaniniuraitemoana, ‘a piti matahiti ‘i teie nei, ‘aita hō’ē noa a’e ‘ite ‘i te pae nō te mau hōho’a uira. I teie nei mahana, ‘ua ‘aravihi-roa-hia ‘ona maoti te fa’aineinera’a tōro’a « Campus 2023 ». Nāna ‘e ha’apa’o ra te ha’apararera’a parau ‘a te ‘āmuitahira’a nō te ‘au. « Tā’u ‘ōhipa oia ho’i te fa’atīanira’a ia te ‘au nā roto ‘i te mau rāve’a ‘āpi ‘o te natirara. Nā’u ato’a ‘e tītau ‘i te mau pāpa’i ve’a ‘ia tupu ana’e te mau tata’ura’a. ‘Ua au roa vau ‘i teie ‘ōhipa« .

Mai ia Tane ra te huru, 19 rātou tei tonohia ‘i roto ‘i te mau pupu ‘e ‘aore rā te mau ‘āmuitahira’a tū’aro nō te ha’api’ira’a hō’ē ‘ōhipa. « ‘Ua riro teie fa’anahora’a ‘ei rave’a nō rātou nō te ‘apo mai ‘i te mau ‘ite ‘āpī. ‘E nehenehe atu ra ‘ia rātou ‘e amo mai ‘i te ti’ara’a nō te fa’anaho anei ‘i te mau fārereira’a tū’aro« , te mau ha’apāpūra’a teie ‘a Patrick Lopez-Diot, nāna ‘e tī’a’au ‘i te « campus 2023 ». « Matara ato’a te ‘ūputa nō te ‘ōhipa. ‘Ua hope te fa’aineinera’a ‘i te ‘āva’e mē ra ‘āre’a ra nō te mau hi’opo’ara’a ‘i te ‘āva’e tiunu-tiurai ra ia ‘i te tupura’a. Te ni’a te mau pīahi ‘i te revara’a ‘i te fenua Farāni. ‘E haere rātou ‘e turu ‘i te tōmite ta’urua nō te harura’a ‘āu’a nō te ao nei nō te fa’ahorora’a pōpō ».

‘I te fenua Farāni te reira taure’a ‘e tāna ‘ōhipa. « Ei hi’ora’a, te vai ra te tonohia ‘i te vāhi ‘ōperera’a ‘i te mau tāreta parau fa’ati’a, te tahi ‘i te pū fāri’ira’a, ‘i te paraura’a ‘a Tane. ‘O vau iho nei, ‘e tanohia vau ‘i te tuha’a ‘o te mau ha’apararera’a parau. Nā’u ‘e ha’apa’o ‘i te feiā pata hōho’a anei, ‘e arata’i ato’a vau ‘ia rātou ‘i te mau vāhi ‘e fa’ati’ahia rātou nō te patara’a ‘i te mau hōho’a« .

Te pitira’a teie ‘o te taime teie mau taure’a ‘a reva atu ai ‘i te fenua Farāni. ‘I te matahiti ‘i ma’iri a’e nei ‘i te ‘oire nō Toulouse rātou. ‘I reira, ‘ua ‘ite atu ‘e nahea ‘i te fa’anaho hō’ē ha’utira’a fa’ahorora’a pōpō.

TNTV

Parau 'āpī hōpe'a