I te ‘ōmuara’a ra ihoa ‘ō te mahana mātāmua nō te pu’e tau fa’ata’ahia nō te tūatapapa i te tāpura faufa’a a Pōrīnetia Farāni, ‘ua fa’atae ‘o Oscar Temaru, Antony Géros ‘e Moetai Brotherson i tō rātou tāpa’o « aroha ‘e fa’aitoito ato’a » ia Edouard Fritch.
Tei te fare ma’i ‘i Paris te peretiteni nō te Tapura, ‘ua tāpuhia ‘ona i te pō mahana piti. « E nehenehe e parau e mea ma’ita’i ‘ona, ‘ua tupu maita’i tōna tapūra’a », i te reo ‘o Tepuaraurii Teriitahi, mero ‘āpo’ora’a rahi.
Nō teie nei taime ‘aita i pāpū atu ra ‘afea ‘e ho’i mai ai : « E fa’aea ā ‘ona ‘i Farāni nō te hō’ē taime, ‘aita mātou i ta’a e fea taime. Tā mātou e hina’aro, ‘ia maita’i ā ‘ona, ‘ia rapa’au-maita’i-hia ‘ona, ‘ia nehenehe ‘ona ‘ia ho’i mai ‘i te fenua nei », te pū’ohura’a a Tepuaraurii Teriitahi.