I teie taha’ara’a mahana nei, ua tu’u te pū hi’ōpo’a ra’a reva nō Tahiti Faaa ‘i te ta’amotu nō Ni’amata’i, Raromata’i ‘e te motu no Mopelia ‘i raro a’e ‘i te fa’aāra ra’a ‘ū puātou nō te Ua puai. Ia au ato’a ‘i tāna mau tohura’a ‘e riro ‘o Pōrinetia ‘i te fa’aruru ‘i te vero Ua tae atu ‘i te hōpe’a ra’a nō teie matahiti.
Poro’i mātamua, ‘e riro e ‘eita te fenua ‘e ro’o hia ‘i te mata’i rorofa’i, tera rā ‘i ni’a ‘i te mau ta’amotu tōtaiete, tuamotu ‘e ma’areva, titau hia ia vai ara noa. Nō te mea, te vai ra te ho’ē ha’apu’era’a ata ‘e ua ‘ī te pape pi’i hia te ZCPS ‘e te teretere rā ‘ōia ‘i ni’a ia Pātitifa ‘apato’a.
« Teie tore ATA, te ha’apu’e nei ‘oia mai te mau pae Tuamotu ‘e Tōtaiete mā ‘e haere roa ‘i te pae Ma’areva mā. E nehenehe ‘oia ‘e mara’a atu ‘i te pae to’erau ‘e ia oti topa fa’ahou mai i te pae ‘apato’a. Nō reira, mai te peu e hi’opo’a maite hia teie mau vāhi, te rahira’a ‘i te pae tuamotu ‘e ma’areva mā, ‘e teiaha te huru ‘o te reva. E tia’i hia rā te ua puai ‘e peneia’e te vero uira i te mau mahana ‘i muri » te reo ‘o Guillaume BOUIN, ‘aivana’a no te reva ‘i te pū hi’opo’ara’a reva nō Tahiti-faaa.
I teie hope’a matahiti ‘e topa rahi te ua, pae hāere roa ‘e ono mahana te māoro, tā te pū hi’opo’a ra’a reva ia ‘e fa’ahiti nei. E raea’e-roa-hia hānere rītera pape ‘i ni’a ‘i te metera tuea ‘i te mau ta’amotu ma’areva ‘e Tōtaiete mā. Nō te huru ‘o te miti, ‘aita te reira e ha’ape’ape’a nei.
« Mai te peu ‘e pa’a’ina mai te vero uira, ‘e puai ato’a te miti ‘e nehenehe ta matou e fa’aāra ‘oi’oi atu ‘i te ta’ato’ara’a, te taime ‘e te vahi e pa’a’ina ai. Tera rā, ‘aita e fifi rahi ta matou e nehenehe e parau atu i ni’a ‘i te puai ‘o te miti ‘i teie mau mahana i muri » Guillaume BOUIN.
Nō reira, ‘aita atu ‘e poro’i, ia vai ara noa tātou ‘i mua ‘i teie vero ua. E nō te mau ha’amāramarama ra’a hau atu. Hāere atu ‘i ni’a ‘i te tahua nātirara ‘a te pū hi’opo’ara’a reva nō Faaa.
